Friday, November 25, 2005

Bunyag kang yelo

Kahapon amo ang una ko nga kita kang snow flakes. Daw manul-manul gid no? Kag kadya mas duro pa gid ang naga-hulog kag puti run ang palibot. Daw parehas gid sa mga litrato kag sine nga nakita namun. Daw kanami lang lantawon hay rugya run ako sa sulud kang opisina kag hindi ko mabatyagan ang ramig. Pero kaina rugto sa sagwa nagapanaw ako sa yelo, daw hadluk man ako basi makadanlug, te nagakaput ako kay Key. Kung makadanlug ako karia te darwa kami ang matumba hi hi hi 'falling on the snow' gwa na karia eh.

Te amo dya ang una ko nga eksperyensya kang snow nga dya. Duro ang naga-pusta rugya kang 'white christmas' kuno. Grabe tana ang pusta-anay nanda rugya.

Thursday, November 03, 2005

Manuscript

hay sa wakas na-print out run gid ni kiko ang manuscript kang phd dissertation na. te i-tugro na dya sa ana nga adviser kag maghulat kung may mga corrections. tapos revision kag final submission. tapos karia, mahulat tana mga sangka bulan kag ma-schedule ang ana nga viva or examination. pangamuyo gid namun nga mabatun dya ang ana nga manuscript kag matugru ang ana nga PhD degree. para makauli run kami sa bangkok. plano namun mauli man magbakasyon sa april 2006 sa antique. tinguhaun namun nga rugto sa san jose para sa binirayan. lantawon pa namun ang sked esp kay key hay magstart run tana tudlo liwat sa univ na sa mayo ang abre klase sa bkk.

kahapon 6pm run kami nag-uli. dulum dulum daw alas 9 sa gabii. te amo run ria rugya ang panahon, bugu lang ang sirak kang adlaw.

Wednesday, November 02, 2005

Dapli kang igma

Hay feeling ko daw sa Antique lang ako kadya nga tag-irigma. Naga-uran-uran pa abi rugya. Nagabalon kami kada adlaw para sa amun igma. Ginaraha ko ang amun dapli sa gabii para madara sa sunod nga adlaw. Te ang dapli namun kadya ginsanlag nga baog, ginisa nga ginamos kag ginlaga nga okra. Kag kan-on syempre. Gusto ko daad himu-on nga hinanggup ang baog garing hay gintamad ako magdara kang kutsilyo para sa kamatis. Ang ginamos tana gingisa imaw kang baboy kag may chilli para makahang. Te ganahan kami kang kaun kag naubos ang balon namun nga kan-un. Ang ginamos (barrio fiesta) ginbakal ko kang sarang bulan rugto sa pinoy store sa edinburgh. Duro man ang pinoy foods rugto, kag nakabakal man kami kang smoked bangus, baog, mang tomas lechon sauce, polvoron kag duro pa gid.

Tuesday, October 18, 2005

Mga nagakaratabo

Duro gid ang nagkaratabo rugya sa amun kabuhi sa Scotland. May mayad kag may hindi man mayad. Duro ang nasugata namun nga mga tawo, lain lain ang mga ugali. Ang hindi ko nagustuhan rugya amo ang pa-indis-indis kang kada sara, hasta nga lapakun nanda ang isigkatawo para lang makauna sanda sa kung ano man ria ang gusto nanda nga sanda ang nagapanguna. Ambay gani ah, hindi ko gid dya maintindihan. Ibutang ta run lang nga sa sobra kuarenta anyos ko nga edad (hi hi hi te nabuking gid ako) duro run na-agyan ko kag nalambot ko nga wara run takun ti oras magpa-indis-indis nga ria. Pero bisan halin pa kang una rugto sa SJA amo ria ang tudlo kang mga madre kanamun nga hindi kami mag-amo karia. Hay bukut ti nami dya nga ugali. Mas dapat pa laban ang pagpakita kang pagpalangga sa isigkatawo, kag pag-pangabuhi nga nagahirupay kag may kahadluk sa Gino-o. Amo lang dya ang puede makatugro kanatun kang kasadya sa adlaw-adlaw, pasalamat sa Gino-o sa mga grasya kag bugay nga ginatugro na adlaw-adlaw.

Tuesday, October 11, 2005

Pasensya gid

Pasensya gid sa tanan nga buhay run wara gid ako ka sulat rugya. Saku gid abi kag kadya rugya run ako sa Scotland. Kung sa diin run takun kadangat. Antes rugya nag-agto man ako sa Netherlands mga sangka semana man kami rugto. Nagkit-anay run lang kami ni Key sa Schiphol airport sa Amsterdam hay sa Edinburgh pa tana naghalin, ako tana halin gid eh sa Bangkok. Nag-agi man ako sa Frankfurt, kang naglupad pa Amsterdam. Te buhay ang hulat ko kay Key hay hapon pa ang ana nga abot, ako tana aga pa. Nag-tambay lang ako rugto sa airport. Ginbilin ko lang ang mga bagahe ko rugto sa basement nga may automatic locker, hulugan mo lang kang 6 euro bala to mong te puede rugto matago mga gamit daw pira man ka oras ukon adlaw. Te dara ko lang ang akun notebook computer kag mag lagaw lagaw. Nagpangita man ako kang lamesa nga mapungkuan tapos nag-obra man ako gamay ilabi na gid ang amun presentation sa Netherlands sa meeting rugto ah. Wara ko pa gintawgan ang amon friends hay ang appointment namun kananda 530 pm pa man. Para hindi run sanda ma-istorbo nga mag-abat 2 ka beses eh. Te sadya man akun obserbar kang mga tawo. Duro man ang mga manol manol hi hi hi. Pati ako kis-a may pagkamanol man. Esp ang sangka elevator nanda nga naga-igot te daw mag-gwa ako ka-panic kaharadlukan eh. Anyway duro man tawo sa sulud pero ano bay matabo kung mag-stock-up ria? Parehas to kang elevator sa BFAR sa QC nga tama kadaan run gid. Grabe to pirme kulba ko kada gamit ko kato mong.

OK te naka-abot run gid si Key kag ginpangita namun ang amun migo to nga mal-an nga nag-abat kanamun. Nakakita-ay man gid kami kag mayad man hay wara man tana nabuhayan ka hulat kanamun. Lawig man ang byahe halin sa airport paagto sa anda nga lugar sa Amerongen, parte man kang Utrecht. Te duro amun istoryahanay eh. Rugto kami nag-istar sa anda nga balay hasta kami magpanaw sa UK. Alaga man nanda kami kamayad. Tungud mal-am run sanda ginabuligan man namun sanda sa obra sa balay, parehas abi maghugas pinggan kag iban pa nga pag-assist.

Wednesday, July 20, 2005

Rugya run ako

Sa Canada ... lain gid rugya ilabi na gid ang oras. Nasadyahan man ako nga nagkita-anay kami ni Lumen nga libayun ko. Kag nagbisita man kami kay Tita Baby nga libayun ni Mommy. Nagkita-ay man kami kang darwa na ka bata. Ang isara (Nene) may bana run kag may darwa man ka bata. Si Tita Baby kag ang sangka bata na (Amy) naga-istar sa basement kang balay ni Nene. Si Lumen rugyan man kang una nag-istar kang bag-o pa lang tana sa Toronto. Nami man hay daw cozy ang ambience. Nagyapon kami rugto kag nag-istoryahanay. Sadya man ang amon pag-istoryahanay. Nami daad kung makabisita man sanday Dad & Mom pero sa kabuhayun kang byahe daw budlay gid ria kananda. Pagkatapos nagpanaw kami rugto nagpanumbalay kanday Bimbim pero wara pa tana kaabot. Si Nanay na lang kag ang mga bata na (3). Te wara run kami nagbuhay gid hay gabii run. Sangka bus ride lang man paagto kananda halin sa apartment ni Lumen pero paranawun man pasulud rugto sa housing subdivision.

Balik sa oras nga dya, mga 11 hrs ang urihi sa Pinas, te sadya hay nagtext ako through chikka sa balay ay, gabii run gali rugto, nagsabat si Mom nga mga 10 pm run kag turog run sanda ha ha ha reality check kanakun.

Wednesday, April 20, 2005

Haylayts kang amun pag-uli sa Antique-II

4. Ang pagkirita-ay kang SJA class 1980 - rugto sa Kanyugan Restaurant sa Dalipe. Sadya man kami bisan gamay lang ang nag-agto. Sadya hay nalipat kami ni Key kang Filipino time. Rugto tamun alas-5 hay amo dya ang gin-agreehan namun nga oras. Te naghulat tamun rugto sobra sangka oras antes nag-arabut ang mga klasmeyts ko. Pero sadya man wara man kami natak-an hulat hay nami man ang dekorasyon rugto sa sulud kang restawran.

Gin-imbitar man kami ni Anding and Norman sa Cindy's II para magpizza. Imaw man namun rugto sanday Ulai kag Lea S. Wara ka-abot si Bambi hay saku siguro. Nami man ang ambyens rugto sa Cindy's, kag ang kalidad kang pagkaun nanda mayad man.

Monday, April 18, 2005

Haylayts kang amun pag-uli sa Antique-I

Ang mga haylayts kang amun pag-uli rugto amo dya:

1. pagbukas kang jollibee sa calle carretas – abu asta man mag-alas dose sa gabii nukes sanda hay kaduro duro gid ang mga tawo. May istorya sanda nga may sangka taga-sur nga ginhambalan na ang taga-San Jose nga dapat sa gabii lang ang mga taga-SJ mag-pila sa jollibee, para matugru-an tsansa ang mga taga-iban nga banwa nga makakaun sa jollibee sa adlawon, hay basi mabayaan sanda kang last trip pauli.

2. pagbukas kang city square hypermart – pilahay man, grabe ang mga tawo. Kami tana hay paranawun man lang halin sa amun balay, has sa atubang lang man dya kang ANS, te nag-entra man kami to sa pagdinagusu kang mga tawo. Naga-uran pa abi te naga-lao-lao man ang salug kang city square.

3. rigos sa baybay – sa taringting beach, duro run to ang mga beach cottages, te pagustu lang kung sa diin. Rugto kami sa Danilo’s resort hay ang mga cottages nami man, puede pa kahuram kang burug-an kang isda, baboy, manok, karne. Te nagdara kami kang bangrus kag baboy kag ginbu-ug rugto. Nag-order man kami kang pancit guisado kang lumpia shanghai sa Regina’s kag amo ra ginbalon man. Naghapit man kami sa Mercury Drug sa calle real nga may grocery kag rugto nagbakal kang soft drinks. Nami man ang mga cottages hay may saksakan kang kuryente, puede kadara kang sounds. Garing hay naga-pa-indis indis man ang kada cottage kang anda nga sounds, te ginpatay run lang namun ang amun cassette hay tama run kagahud. Kapin pa ang ingud namun puro mga kabataan nga luwas sa music nanda may naga-singgitan pa. sa amun nga mga mal-am run, daw kasakit sa talinga ba. Mayad run lang wara kami nasikagan kang bangrus nga daw kanamit gid

(pagapadayunon)

Ang amun pag-uli sa Antique-III

Tungud nga nakatipalo ako mga 2 ka adlaw antes magbyahe, naga-kiang-kiang ako. Nagpatawag kang manog-hilot nga taga-San Isidro St. kag ana ginhilot ang akon kahig. Pasalamat man ako nga nadura man ang sakit na kag naka-panaw run ako ka derecho kag wara ti problema. Makapagusto run ako ka panaw-panaw sa banwa. Pasalamat man ako nga ka-hulas lang magtawag kang manoghilot rugto kanatun. Ginsukot na ako kang 150 pesos.

Ang una nga panyapon namun pochero ukon lawas kang baka ang amun dapli. Te bisan gabii run nagbira man kami kang kaun. Umpisa pa lang nga adlaw pero daw hindi run namun mapunggan ang magkaun kang mga amo kadya hay nahidlaw man ta kang mga sabor nga rugto lang gid natun masaboran sa Antique. Manamit man magkitkit kang tul-an kang lawas. Ang paris kang pochero amo ang danggit nga ginpakas, kag ginprito. Naga-ragumo lang kun usangon.

Ang amun pag-uli sa Antique-II

Gani sa amo dya nga paminsarun, nagsaka run kami sa van nga gin-arkila kang mga ginikanan ko halin sa San Jose. Nag-deretso kami sa syudad kang Iloilo para mag-igma sa andang paborito nga Chinese restaurant. Halin sa airport nakita ko ang duro nga mga pagbag-o sa Iloilo, kag ang kaduruhun nga mga tawo kag mga sarakyan. Nag-agi kami rugto sa bag-o nga dalan rapit sa baybay para malikawan namun ang trapik sa mayor nga dalan kang ciudad, kag short-cut gali dya hay sa dali lang nga tyempo, nakalambot run kami sa downtown rugto sa Summerhouse Restaurant. Tungod Christmas Day duro ang mga tawo sa restaurant. Nag-order si Daddy kang mga paborito namun nga mga pagkaun. Ang sabor kang pagkaun parehas lang kang una, kag daw nagtime-travel ako. Nadumduman ko ang mga tyempo kang una nga naga-agto kami sa Iloilo kag magkaun kang amo man dya nga mga pagkaun. Ang amon igma nangin preview kang mga pyesta nga amun ma-atubang sa mga sunod nga mga inadlaw. Ahay, ang ginatinguha namun nga low-fat kag low-salt diet daw madura sa tunga kang mga naga-laraway nga mga pagkaun sa atun banwa.

Nag-agi kami sa baraklan kang mga prutas antes mag-pauli sa San Jose. Mga alas dos gid kami naka-halin sa ciudad kang Iloilo kag nag-padayun pa-San Jose. Ang mga banwa sa Iloilo nga gin-agyan namun manami run ang dalan nga aspalto, pero hasta lang man gali dya sa sagwa kang Tiolas. Pag-abot sa sangka tulay pagkatapos kang Tiolas nag-umpisa ang amon kalbaryo sa dalan. Nalu-uy ako sa akun mga ginikanan nga nabudlayan sa tama gid ka-undag kang sarakyan tungud ang dalan tama gid ka sayud. Daw sobra pa sa dalan rugto sa gin-agtunan namun nga liblib sa Laos. Karadlawan nga daw kasubu hay sa kilid kang mga dalan nga dya may mga karatula nga naga-hambal nga atun nga dalan atun andaman. Ang pag-asa lang nga nakita namun nga gina-preparar man ang dalan para mapadayun ang aspalto. Pero hambal kang iban nga buhay run kuno nga amo dya ang sitwasyon, pero wara pa napadayun ang obra. Mga sangka oras gid nga amo kadya ang tumbo-tumbo namun sa van. Bisan natuyo kami kag nami daad magturug garing hay hindi gid puede sa sobra ka-undag kang sarakyan. Nagpino run ang dalagan pagka-abot namon sa sagwa kang Guinsang-an. Abu, sakto gid man gali ang istorya nanda parte sa aragyan nga dya nga grabe gid kasayud. Sa pinsar ko lang nga mas mayad pa kang una mga mid-1980s daw kanami lang magbyahe sa mga bukid nga dya.

Pag-abot run sa Guinsang-an daw nagalupad lang ang van hay nami run ang karsada. Daw kanami man makita ang mga pamilyar nga mga ralantawun, ang kilid baybay, ang palibut nga berde pa, ang mga balay kag mga eskuelahan. Nabatyagan ko gid ang kahidlaw sa Antique kang ginbuksan ko ang bintana kang van, kag ang dapya kang hangin nga wara gid ti parehas amo ang nagharuk sa pungyahon ko, bilang pagbaton sa akun nga pagbalik.

Daw kadasig lang ang byahe halin sa Malandog, tapos sa poblacion Hamtic, kag pa-San Jose. Hindi lang man-an na-agyan run namun ang SAC, Bagumbayan, Central School, Cathedral kag brubhay ang EBJ plaza run gali. Nagliko kami sa atubang kang capitol kag nag-agi gid sa mayor nga dalan sa atubang kang dali run lang mag-abri nga Jollibee. Derecho kami sa amon kalye sa Rosario St. kung sa diin daw parehas man gihapon ang mga balay kag mga tawo nga nakita namun. Duro pa gihapon ang naga-taratambay sa kilid kang dalan, may naga-sipal sa lupa, may naga-basketball, may naga-istoryahanay, kag may nagatagay kang irimnon. May mga ayam nga kutimun nga naga-libot libot man. Dumduman ko ang kalye nga dya nga adlaw-adlaw ko gina-panaw kang una halin sa balay pa-agto sa eskuelahan sa aga kag pagbalik sa hapon.

Pag-abot sa balay namag-o man ako hay nagla-in man ang landscaping. Nami man nga makita ang mga naga-burulak nga mga tanum, nga lain-lain ang anda nga kolor kag hitsura. Ang kakapoy sa byahe nadura man pag-abot sa balay kag makakita kang pamilyar nga mga ralantawun. Ilabi na gid kang makita ko man ang sangka libayun ko kag ang anang pamilya nga naga-istar imaw sa akun mga ginikanan. Daw kanami lang nga makauli man, hay nabatyagan ko lain nga pangabuhi rugto kag sa amun ginhalinan. Natural lang hay bakasyon ang tuyo namun sa pag-uli, gani wara kami naga-paminsar kang mga obra kag responsibilidad sa opisina nga ginhalinan namun.

Ang amun pag-uli sa Antique, Philippines-I

Halin kang 25 Dec 2004 hasta 5 Jan 2005, rugto kami sa San Jose, Antique para magbakasyon. Abril 1999 pa ako urihi nga nag-uli sa San Jose, sobra run lima ka tuig. Sa duro nga nabatian ko nga nagakaratabo sa probinsya ta, may mayad, may malain, daw naga-agaw-agaw ang baratyagun ko sa akun nga pag-uli. Mga pamangkot sa akun paminsarun amo dya: masadyahan ayhan ako sa akun pag-uli? Ukon, kalbaryo/problema lang ang akun masugata? Matuud nga rugyan ang ‘excitement’ hay magkirit-anay kag mag-iririmaw ruman kami kang akun mga ginikanan, mga bugto, mga parientes kag syempre mga amiga/amigo ilabi na gid ang akun mga klasmeyts sa SJA, may rugyan man nga nagapugung nga hindi gid mag-over-excited basi bala nga madismaya lang sa urihi. Pero nag-daug gid syempre ang handum ko nga makauli. Ilabi na gid nga nakabaton ako kang CD ni Dante Beriong nga gintugro kang libayun ko, kag ginapamatian ko ang kanta na nga, Mauli gid takun sa Antique.

Nag-abot kami sa Manila kang 24 Dec halin sa Bangkok, kag pagkasunod nga adlaw naglupad run kami paagto sa Iloilo. Kang nagaplano pa lang kami para sa domestic flight namun napinsar man namun ang mag-derecho lupad sa San Jose. Ugaring hay duro ang mga konsiderasyon kag nagdaug gid ang desisyon nga mag-PAL paagto sa Iloilo. Gin-alaw-alaw kami kang akun mga ginikanan sa Iloilo. Tudo lipay ko nga makita sanday Daddy kag Mommy. Ang urihi namun nga pagkit-anay katong Dec 2001 pag-agto nanda sa Thailand. Nakita ko ang mga pag-baylo nga dara kang mga tuig nga naglipas, sa andang kalawasun. Ginapunggan ko ang akun luha hay duro ang mga tawo. Nakita ko man ang kalipay sa anda nga mga guya kag sa andang pagkupkup kanakun kag sa bana ko. Bisan pa nga kabudlay magbyahe halin pa-Iloilo, gin-abat gid nanda kami.

Sa Iloilo airport parehas man gihapon nga naga-aragaway ang mga porter sa pagbu-ul kang customer kag sa pag-hakwat kang mga bagahe. Ang akun bana nga wara na-anad kang porter-porter nga dya, hindi magsugot nga itugro sa porter nga kilala ni Daddy ang amun mga bagahe. Ejemplo kang lain-lain nga kultura nga nag-bunggu-anay, kag ayhan maga-resulta sa kahadluk sa pinsar kag baratyagun kang estranghero. Ginhutikan ko ang akun bana nga itugro na run lang ang bagahe namun hay kilala man namun ang porter.

Gin-padumdum namun ang amun lawas nga kami naga-bakasyon kag mag-enjoy, gani hindi namun pag-i-analisar ang kada makita namun para mabatyagan gid ang kasadya sa amun palibot.

Pangamuyo sa Adlaw-adlaw

Gino-o, salamat gid sa bag-o nga adlaw
Ako, imo ginpukaw
Pagbukas ko kang akun mga mata
Kita ko ang pagsirak kang adlaw.

Akun gina-tugyan
Ang bilog ko nga kalawasan
Ginapangayo ko ang kahilwayan
Sa mga butang nga hindi mapuslan.

Bag-o nga adlaw
May dara nga kasanag
Ginapangayo ko para sa tanan
Kalinung sa bilog nga kalibutan.

Gino-o, ikaw ang halinan
Kang mga mayad nga butang
Kabay nga hindi kami malipat
Pirme kanimo magpasalamat.