Turo Luha

Nagaturo ang akun luha kadya hay na-miss ko run ikaw. Ilabi na gid kang nabatian ko nga nagpanaw kaw run sa iban nga lugar. Daw ka san-o lang nga nag-imaway kita rugya. Kag daw hindi manami ang atun pagbulagay? Kabay nga napasaylo mo ako sa akun mga ginpanghimo nga hindi mo nagustuhan. Tungud nagapalangga-anay kita, daw nadura lang man ang mga hindi manami nga mga baratyagun nga to. Mayad lang nga nagapasensyahanay kita. Amo gid man ra kung magburugto, may oras nga naga-sampukanay ang atun ideyas kag pagsirinayo. Pasalamat lang kita nga bisan ano nga pag-supok kang mga nagakaratabo, hindi gid maguba ang atun relasyon bilang magburugto kag magkapamilya. Hay sa urihi kita man gihapon ang mag-irimaway. Bisan may kabudlay nga maagyan wara ti kaso ria basta rugyan ang suporta kang kada isara sa isara. Bisan rayu-ay kita nga lugar rugyan ang naga-bugkus kanatun bilang magburugto. Ang pagpalangga nga gintudlo kag gintugro kang atun mga ginikanan kag kang mahal nga Diyos amo ang magtulud kanatun nga mag-atubang kang kung ano man nga matabo sa adlaw-adlaw. Karon nga rugyan ikaw run sa bag-o nga lugar, ang akun handum kag pangamuyo para kanimo amo nga mangin mabaskug ikaw sa tunga kang kabudlay kag kasubu, kag mangin madinalag-un ikaw sa imo nga pinili nga trabaho; nga malab-ut mo ang imo mga handum para sa imo lawas kag sa imo nga pamilya. Kabay nga pirme ikaw magparapit sa Gino-o hay tana lang ang nakamaan kang tanan kag gamhanan sa tanan.

Lantaw Sine

Kang gamay pa ako, nagtawas ako sa akun magurang lantaw sine sa Gem Theater. Wara nyo run dya naabutan nga sinehan sa San Jose. Mga alas dos sa hapon kami nagsulud. Plano namun mag-gwa mga alas singko kag magsakay lang kang tricycle pauli sa balay. Ang sine kato showing si Nora Aunor kag Manny de Leon. Ayhan duro kaninyo wara gid kabati sa darwa nga ngaran nga dya. Sanda kato ang pinaka-popular nga love team sa mga artista. Dumduman ko pa nga ang buhok ni Manny de Leon medyo labug kag parehas gawa sa buhok si Raw_ayan sa photo profile na.

Sige kami lantaw kang sine kag ginpaliwat pa namun. Masubu ang istorya kag naghibi kami. Pero happy ending man gihapon. Love story. Masubu hay nagsakay run sa eroplano si Manny pero nabilin tana si Nora. Pero paglisu ni Nora nga maghalin run, nakita na si Manny ga-smile ka na kag nag-kupkupanay sanda. Nawili kami katama.

Mga kapira siguro ka beses nga ginsugo ako kang magurang ko nga linglingun kung sanag pa sa sagwa kang sinehan. Nagpati man ako kag magpanaw sa puertahan kang sinehan kag maglingling sa pihak kang kurtina nga velvet nga grabe kabug-at. Violet ang color. Kada lingling ko kita ko nga sanag pa man. Te kungdi sadya-sadya man kami nga sanag pa puede pa kami ka lantaw liwat. Daw maano run mong kay Nora Aunor. Ano man tana nga wara gid kami nagpinsar nga daw kabuhay run kami rugto sa sinehan. Tingala run lang tamun kang ginparapitan kami kang manugbantay kang sinehan kag ginhambalan nga gin-abat kami kang amun ginikanan. Abaw nakulbaan man ba ako hay andut gin-abat gid nanda kami. Gali karia hay gabii run mga alas nwebe run to siguro. Ay gali ang nakita ko nga sanag amo ang sulo sa lobby pero wara ko nakita nga dulum run gid sa sagwa kag gabii run.

Halin kato wara run kami gintugtan maglantaw nga kami lang. Pagkatapos kato nga hitabu daw ginakulbaan man ako ka paminsar nga ano bala natabo kanamun kung wara kami gin-abat kang ginikanan namun? Daw kasadya lang paminsarun kadya ang amo to nga hitabo. Wara man nagtubu kanakun ang kahadluk maglantaw sine a. Daw agi lang man to hay kang nagbahul run ako kag rugto run ko sa Manila naga-eskuela nagalantaw takun sine bisan ako lang sara. Bisan hasta last full show. Pero alerto lang pirme kung may stampede kag irinaway sa sulud.

Bulong sa Kahidlaw?

Sa pagsirak kang adlaw sa kalangitan
Akun nadumduman ang manami nga nagtaliwan
Mga inadlaw nga wara ti gina-pas-an
Nga problema kang kalibutan.

Kadya sa tunga kang pag-pangabudlay
Sa pihak kang kalibutan kag baybay
Akun madumduman ang kabuhi nga hilway
Daw kanami lang kag matawhay.

Ano ang nagapagung kanatun
Magpauli sa probinsya nga matahum?
Antique, ikaw lang sa gihapon
Ang akun balay sa taguipusuon.

May kahidlaw, may kasakit
Sa akun nga pag-isahanun
Ang kabug-at sa akun dughan
Daw kabudlay gid pas-anun.

Mayad lang nagasirak pa ang adlaw
Nagapadumdum kanakun
Nga may sunod pa nga mga inadlaw
Nagatugro kanakun kang paglaum.

Kinahanglan gid hungdun
Nga makauli sa probinsya natun
Nagapanaw ang panahon
Dakpun gid ang mga tini-un.

Nadimat

Nag-uli kami kang Abril - Mayo 2007. Pero tatlo lang ka semana. Daw kanami lang rugto sa atun, bisan grabe ka-init. Daw nadimat lang ako kag daw nami mag-uli pa gid. Nasadyahan ako hay duro akun ginpang-agtunan - Baguio, Iloilo, Antique. Kag syempre sa Manila mismo nakalagaw kami sa Mall of Asia, Makati, Pasay, UP Diliman, Tandang Sora. Kulang pa gani ra pero bastante run man sa tyempo nga rugto kami. Nagkitaay man kami kang akun mga amiga kag amigo kag mga imaw sa obra kang una. Te kungdi daw ka sadya lang. Budlay lang ang byahe nga Iloilo-San Jose. Bisan na-improbar run gawa ang dalan rugto sa bukid nga aragyan pero ang van nga ginagamit bukut te komportable. Para guro ang van sa mga gagmay kag putot? New generation kang mga tawo sa probinsya? Mayad pa guro magbus na lang. Bale tatlo kami ka beses nag-agto pabalik sa Iloilo halin sa San Jose. Luwas pa dya sa pag-abot kag pag-panaw namun. So apat gid nga paagto kag pabalik. Amo man gali nga ang mga muscles ko sa batiis kag paa nagburukol. Gani kadya may physical therapy ako kada semana rugya para lang ma-untay ang mga muscles nga dya. Ang pagbyahe amo daw silut sa lawas kung bukut mayad ang sistema. Bisan rugto sa Iloilo airport daw kabudlay man. Air Philippines ang amun airline. Ang check-in counter na sa sagwa pa kang airport, i.e. rayu ukon sa lain nga parte kang airport. Ma-check-in rugto anay sa Air Philippines office, tapos mapanaw pabalik para magsulud sa departure area. Ay te grabe pa abi kainit. Mayad lang ra sa office nanda may mga purungkuan pero kung duro ang pasahero gutuk man. Tapos kabuhay maghulat. Ang checker kang mga bagahe buhay pa mag-abot. Ano hay buksan gid tanan nga bagahe para inspeksyunon. Pagkatapos check-in, hindi pa gihapon kasulud to sa airport mismo hay kung 220pm ang flight, 1pm pa puede ka sulud. Pero ang check-in mga 1230pm puede run. Te ano ang himuon sa 30 minutos nga hulat? Kainit pa abi sa sagwa ka airport. Kag wara man ti mga shops gid nga komportable. Ahay daw nabayaan run kang 'last trip' ang airport. Pero may bag-o nga magbukas nga international airport sa Iloilo. Garing hay marayu sa city. Kag sara pa, kabay nga may training ang airport staff sa dapat himuun ilabi na gid sa customer relations, hospitality and professionalism. Para nga ang pagka-international nanda kag world class daw mag-angay man. Ahay ... pero bisan may mga amo kadya nga set-backs, nadimat pa gihapon ako kag daw nami mag-uli liwat. Hidlaw man ko sa pamilya ko kag mga amigo kag amiga.

Kinaray-a.com

Nabuhayan man ako nga wara ka post rugya tungod sa kasaku-un sa obra kag sa kabuhi.

May bag-o nga site ang mga Kinaray-a speakers, ilabi na gid mga kasimanwa ko nga mga taga-Antique. Mayad man nga may site nga amo kadya, para makatiringbanay kag magkakilalahay ang mga taga-Antique bisan rayu-ay. Sobra run 500 ang myembro rugto kag sadya lang mag-chat, mag-share kang mga opinyon kag mga talento sa pagsulat, kag duro-duro pa gid nga mga inter-aksyon. May mga pariente, classmates kag mga kakilala nga buhay run wara nagkirita-ay or kontakanay, or may dyan man nga wara pa nagkilalahay ... te mayad man dya nga venue para sa mga amo karia. Saku run to sa pagpreparar kang launching kang site sa 30 Dec 2006 sa SAC auditorium. Kabay nga maging successful kag mayad lang ang gwa na kadya. Pasimuno kang mga younger generation, kag kabay pa nga mayad nga training ground para sa mga future leaders kang probinsya natun.

Bisitahe nyo lang ang site sa amo dya nga link: www.kinaray-a.com

Ang Lubung ni Baby Ruina Arguill

amo dya ang acct kang last sat (19 aug). kami ni key nag-agto sa taladthai (wholesale market near ait) para bul-un ang flowers nga gin-order. bale ang mga white roses nga i-drop sa grave tapos ang basket bouquet of white chrysanthemums nga gin-order from our family eh. pero wara lang ti ngaran pero ginhambalan ko si noy and judith nga halin dya kay dad and mom. tapos nag-agto kami kay sis puk hay nagtawag tana nga may ginprepare man tana dugang nga snacks te hapit kami rugto to get it. tapos nag breakfast kami anay eh. then we proceeded sa morgue kang hospital where the baby was kept. ginhulat man namun rugto si nonoy kag judith. grabe while waiting for them duro man to tawo nga nagahulat man to retrieve body of their dead. may nagahiribi man eh siguro mga bodies nga napatay the night before tapos ang mga relatives nag-agto hay they received the news. te kita-ay daad kami to sa hosp between 9&930 am pero nagtawag si noy ma-late daw sanda te we waited untilpast 10. naghapit pa sanda mong to pick-up the coffin nga gin-order nanda, kag ginkarga lang sa likod kang kotse da. te sakay da man si irah, maricel kag ate erly. pag-abot da, lagi eh ginbuul ang lungon from the car and we went in the morgue. si ate erly nagakaput kang camera, kag ako tana video camera. te ang in-charge ginbutang ang body ni baby ruina sa lungon, te hibi man kami to see the baby inside, syempre esp gid si judith and noy, then ate erly said a prayer, te sige man akun video tana. si key helping man. si irah and maricel sa car lang wait. tapos ang in-charge nga staff ginclose na ang lungon, gin-lansangan kag ginseal kang tape daw masking tape man to. then gincarry bala ni key or noy pag-gwa to put sa likod car nila. te ang car nila ang honda jazz nga ang boot is not separate from the passenger compartment, open tana lain sa amun nga vios nga separate gid ang boot di bla. te amo ra e we set to go to cholburi where the cemetery is. pero naghapit pa tamun ni key sa condo (aragyan man) hay nalipatan ko dara akong bulong sa BP maintenance kag vit C. normally puede ko man take later pero i was thinking i might need to take that morning due to stress and etc. te para kalma lang. finally we drove off na una na sila noy. then halfway may motorway service center we stopped kita-ay kami to and had lunch sa KFC. noy left the engine running para bukut init. the coffin was inside the car. we went inside KFC to eat. duro man kaun namun hadluk magutman man rugto sa patyo basi malawig ang ceremony. then we moved on again. te naghapit pa kami ni key sa gas station nearby para sa ice sa cooler for the water nga i-distribute later. 2pm ang schedule for ceremony, sanday nonoy naka-abot rugto mga 1 or so, kami tana mga 145 hay nabuhayan kami to sa gas station for the ice. anyway pag-abot namun rugto napuesto run nanda ang coffin sa front. tapos ang friends from bangkok dyan run man. te ginplastar namun ang flowers nga dara namun rugto sa front. then 2 more cars arrived nga from bangkok, imaw ni mark sandlin who officiated the funeral service. ang big bus from ait wara pa kaabot. mga past 2 pm nagtawag sanda te mga 20 or so minutes pa sanda away ginhulat run lang. then 2 more cars arrived sanday omey and danny bildan. then the big bus with about 45 adults and kids. ginplastar pa ni noy man ang ana nga mic kag amplifier hay dara kang bus to. pero kami tana dara namun ang battery operated nga amplifier for the wireless. te wara ti kuryente mong rugto. open ang area except for the roof, te medyo mahangin man. nagadulum dulum gani abi namun mauran wara man pero mayad hay bukut ti init gawa. ako ang nag-organise kang ceremony and nag-emcee man eh. te duro nagahibi daw mahibi man ako but i had to be strong ah. naga-kudug man ang voice ko when i talked esp reading the verses and the poems, and also when singing. nag start ang program with me reading some verses from the psalms then singing 'Lord I lift Your name on high', then opening prayer si bro alan gonzales. after that special number si ditdit, she sang 'Trust His Heart'. then si Mark Sandlin to share an encouragement from the word. te hambal na he will talk to encourage those who are living. he shared the assurance that baby ruina is in heaven and we have hope to meet her face to face. that is an assurance, the truth for those who believe in Jesus as Saviour and Lord. it is indeed a blessed hope. after that noy and judith went to the front to share/acknowledge everyone. judith talked pero syempre with tears but she tried to be strong. lawig man hambal na mayad ginsulat na te basa na lang. tapos si noy he was holding judith eh. tapos karia i led her to her seat and noy sang a special number entitled 'With Hope'. very touching gid tana. after that mark prayed again, then we sang the last song 'He will carry you'. then we had group picture tapos procession to the place of burial while the choir sang, 'God will take care of you'. as we reached there the white flowers were distributed to each one. there we sang 'Father I place into Your hands' then mark again prayed and said some verses. then the coffin was lowered. after that one by one people threw the white roses inside to symbolize letting go and saying goodbye with hope while singing, 'My peace I will give unto you'. white is for purity and hope. then the immediate family members (noy, judith) threw the roses, and then irah threw 2 stuffed toys. after that the group went back to the shade where they continued singing and snacks were served. pero kami rugto pa waiting then the workers covered and sealed the tomb with cement. then we walked back man rugto sa shade and joined in the snacks and fellowship. te mga 5 or so run gid man kami kahalinrugto.

Dugang pa nga mga ralantawon sa atun

Taringting Beach

Ang mga tricycles nagduro run gid ... kis-a sanda pa ang daw hari sa dalan

(suno sa mga kilala ko nga may mga jeep kag awto)!

Ang swimming pool sa Binirayan Sports Complex

Toto Cayo's blog

Amo gali dya ang bag-o nga blogpage parte kay Toto Cayo: http://totocayo.awardspace.com/. Amo dya ang bata nga taga Mapatag, Hamtic, Antique nga may sakit sa dughan (may buho ang ana nga heart) nga gindara sa Phil Heart Center for Asia para maoperahan. Karolooy ang ana nga sitwasyon sa halos tanan nga aspeto (physical, medical, institutional, financial) pero ang mayad nga nakita ko rugya amo ang pag-ugyon kang mga tawo para mabuligan sanda. Kung ang pagburuligay kang mga tawo sa duro duro nga aspeto kang kaso nga dya ma-doble kag ma-triple ukon sobra pa, para masolbar ang mga lain lain nga problema kang atun nasyon, siguro makita ta nga may pag-asa pa man gid ang Pilipinas nga makabutwa.

Manami kag sayud nga lantawon

Kanami nga lantawon, daw kabatyag man ako kang kahilway sa akon dughan.





Amo dya ang dalan pa-Iloilo halin sa San Jose. Daw ginabungbong utok mo kag tanan nga lawas kada agi rugya. Amo ra nga bukut klaro ang litrato hay sagi uyug kang sarakyan. Kabay pa nga nami run ang dalan nga dya?

Ang pagkita-ay liwat

Kanami lang lantawon ang mga classmates ko kang una, te sobra run 40 ka tuig ang mga edad namun pero rugyan pa gihapon ang 'bond of friendship' bisan duro run ang amun na-agihan sa 25 ka tuig halin nga nagbulagay kami kang high school. Pero hindi gid malipatan ang mga tinuig nga nag-irimaway kami sa SJA. Kanugonan ko lang nga wara ako rugto sa mga haylayts kang kabuhi kang akun mga klasmeyts ilabi na gid ang mga amiga ko. Pero sadya man kada kita-ay namun.

Ang bag-o nga webpage kang Antique

Kadya ko lang gid nga aga nadiskobrehan nga ginbag-o run ang webpage kang Antique. Te lipay man ako eh. Pagbukas ko kang link (halin sa blog ni Toto Cayo) ang una ko gid ginlantaw amo ang petsa. Nakita ko nga 22 June 2006! Hay ang pinakaurihi to nga webpage kang Antique kang 2002 pa. Kabay pa nga duro ang magbisita kag magbasa kung ano ang manami rugto sa probinsya kang Antique. Amo dya ang link Antique Province.

Balita sa atun

Sa kabuhayon nga wara ako kauli sa atun, hidlaw man ta kang mga balita daad halin rugto. Ugaring daw wara gid ti regular nga balita haw. Gamay lang ang nagalusot sa online news pages. Wara gid gali ti dedicated nga website para lang sa atun nga probinsya. Andut haw? Ang balita nga mabatian ko halin rugto amo ang parte sa pagsaka kang tanan nga presyo, ang kamahalun kang tanan nga baraklun, ang pangabuhi nga daw kabudlay. Daw nagapanaghoy kuno ang mga tawo rugto sa kalisud kang kabuhi. Gusto kang tanan mahalin rugto kag makita kang mayad nga pangabuhi sa iban nga lugar. Kag bukun lang man sa Antique nagakatabo dya, daw bilog man nga Pilipinas amo dya ang sitwasyon. Hindi man ako makakomentar pero amo lang dya nga bisan sa balay nagahambal sanda kulang kuno ang ginapadara namun kananda kada bulan. Aguy a ...

Binirayan and Fiesta

Kanugon nga hindi kami makauli kadya nga Abril kag Mayo. Naplano namun nga mauli ugaring hay hindi pa kami makabalik halin sa UK. Kadya nga adlaw ang viva (phd exam) ni kiko sa university. Salamat sa Ginoo nga napasaran na kag nabuul na run ang ana nga degree. Te makaginhawa run kita kadya.

Parte sa pag-uli, ang gusto daad namun maka-entra man kami sa actibidades kang binirayan rugyan, nga hambal nanda mas bongga pa gid, i.e. mas moderno? kanugon gid. basi sa sunod nga tuig run lang kami maka-kita kang binirayan.

Ang fiesta sa San Jose hindi man namun ma-atenan. Bati ko nga duro to mabisita sa balay hay ang mga parientes halin sa sagwa nag-arabot kag nagcontrata run nga rugto ma-igma. Si mommy tana daw nag-panic hay kuno wara kami ti kuarta para ihanda kananda. Pigado run kabay ang pangabuhi kanatun. Ay te ma-ano kabay kita? Simple lang ang handa eh tutal mga mal-am kalabanan hindi dapat magkaun kang mga 'cardiac delights' nga ria.

Kami man gani rugya sa rum-an mapreparar man para sa selebrasyon kang pag-pasar ni key sa ana nga final exam sa phd. Pili ko man ang 'health foods'. Kung ano lang dyan ang masarangan eh.

Kabay nga ang rugto mag-attend sa binirayan kanatun masadyahan man sanda. Kag ilabi run gid ang ang atun probinsya ma-kilala man kang iban paagi sa mga actibidades nga dya. Garing ang website parte sa probinsya ta daw wara man na-update. Nami daad kung pirme udpated para maka-ganar kang interes kang iban.

Balita parte sa Binirayan: sunstar.com

Pebrero run

Abawwwww kabuhay-buhay man ba kag makasulat ako rugya sa blog ko. Pasensya lang sa tanan hay grabe kasako gid ako. Duro run eh ang nag-karatabo, ilabi na gid nagligad ang sangka tuig kag may bag-ong tuig. Ahay rugya tamun sa iban nga lugar nag-bag-ong tuig. Daw kasubo man nga marayu kami sa amun mga pamilya kag iban pa nga mga pinalangga. Pero kinahanglan magperseberar kami para hindi magkasubo. Sadya man kami hay nag-abot ang akun libayun kag imaw na man ang pakatlo namun. Halin sanda sa Toronto kag nagbakasyon man rugya. Te lipay gid eh kami, naglagaw man kami rugya sa lugar namun, tapos sa Edinburgh, Glasgow kag syempre sa London. Nag-adbenturar gid kami, mayad man nga antes sanda nag-abot daw wara man gid kami kalagaw kungdi naka-tsansa kami lagaw imaw kananda. May iban lang nga na-agtunan namun pero kalabanan gid wara pa namun nabisitahan. Duro nga kodakay kag posingay ah. Sobra sanglibo to ang nabuul namun. Wara pa na-upload hay wara ti tyempo.

Pebrero run. Hambal kang mga tawo rugya sa Scotland nga ang bulan kang Enero kag Pebrero amo ang pinaka-hindi nanda magustuhan nga mga bulan rugya sa lugar nanda, hay tama kasayud ang tyempo - maramig, naga-uran, may snow pa kis-a, duro run lang eh. Te daw amo-amo man karia sa iban nga bulan rugya pero daw sobra pa gid sa darwa ka bulan nga ria. Pero kadya nga tuig hay tungud sa epekto kang global warming daw hindi gawa kuno grabe ang epekto. Pero kanamun nga wara na-anad te amo ria eh. Budlay man gihapon. Kahapon sa comics kang sangka dyaryo ang sangka karakter rugto nagabatang sa kama kag nagbugtaw, ang pamangkot na amo dya: "Pebrero man gihapon?" Kunsayuron nga gusto run gid nanda matapos ang bulan nga dya para maglain run ang tyempo, nga mangin spring run. Hambal gani nanda nga daw temprano ang abot kang spring hay medyo mainit run gawa kag nag-guruwa run ang mga bukad kang bulak kang mga tanum nga kang una, mga marso ukon abril naga-guruwa.

Pasalamat lang kami gihapon sa Ginoo nga gintugruan Na kami kang balay nga mayad ang sistema sa pagpainit. May iban kabay nga mga balay rugya kag dormitoryo nga kulang sa dyan karia nga bagay, te ramigan tana ang mga tawo nga naga-istar.

Kadya nga aga daw nami ang tyempo, nakakita ako kang asul nga langit kag sirak kang adlaw. Nagmuno ako sa bana ko nga pagbalik namun sa Thailand pirme gid ako magtangra kag turukun ang asul nga langit, busugon ang mga mata hay amo dya man maka-alsa kang atun baratyagun, nga daw kahilway lang kang tanan.

Bunyag kang yelo

Kahapon amo ang una ko nga kita kang snow flakes. Daw manul-manul gid no? Kag kadya mas duro pa gid ang naga-hulog kag puti run ang palibot. Daw parehas gid sa mga litrato kag sine nga nakita namun. Daw kanami lang lantawon hay rugya run ako sa sulud kang opisina kag hindi ko mabatyagan ang ramig. Pero kaina rugto sa sagwa nagapanaw ako sa yelo, daw hadluk man ako basi makadanlug, te nagakaput ako kay Key. Kung makadanlug ako karia te darwa kami ang matumba hi hi hi 'falling on the snow' gwa na karia eh.

Te amo dya ang una ko nga eksperyensya kang snow nga dya. Duro ang naga-pusta rugya kang 'white christmas' kuno. Grabe tana ang pusta-anay nanda rugya.

Manuscript

hay sa wakas na-print out run gid ni kiko ang manuscript kang phd dissertation na. te i-tugro na dya sa ana nga adviser kag maghulat kung may mga corrections. tapos revision kag final submission. tapos karia, mahulat tana mga sangka bulan kag ma-schedule ang ana nga viva or examination. pangamuyo gid namun nga mabatun dya ang ana nga manuscript kag matugru ang ana nga PhD degree. para makauli run kami sa bangkok. plano namun mauli man magbakasyon sa april 2006 sa antique. tinguhaun namun nga rugto sa san jose para sa binirayan. lantawon pa namun ang sked esp kay key hay magstart run tana tudlo liwat sa univ na sa mayo ang abre klase sa bkk.

kahapon 6pm run kami nag-uli. dulum dulum daw alas 9 sa gabii. te amo run ria rugya ang panahon, bugu lang ang sirak kang adlaw.

Dapli kang igma

Hay feeling ko daw sa Antique lang ako kadya nga tag-irigma. Naga-uran-uran pa abi rugya. Nagabalon kami kada adlaw para sa amun igma. Ginaraha ko ang amun dapli sa gabii para madara sa sunod nga adlaw. Te ang dapli namun kadya ginsanlag nga baog, ginisa nga ginamos kag ginlaga nga okra. Kag kan-on syempre. Gusto ko daad himu-on nga hinanggup ang baog garing hay gintamad ako magdara kang kutsilyo para sa kamatis. Ang ginamos tana gingisa imaw kang baboy kag may chilli para makahang. Te ganahan kami kang kaun kag naubos ang balon namun nga kan-un. Ang ginamos (barrio fiesta) ginbakal ko kang sarang bulan rugto sa pinoy store sa edinburgh. Duro man ang pinoy foods rugto, kag nakabakal man kami kang smoked bangus, baog, mang tomas lechon sauce, polvoron kag duro pa gid.

Mga nagakaratabo

Duro gid ang nagkaratabo rugya sa amun kabuhi sa Scotland. May mayad kag may hindi man mayad. Duro ang nasugata namun nga mga tawo, lain lain ang mga ugali. Ang hindi ko nagustuhan rugya amo ang pa-indis-indis kang kada sara, hasta nga lapakun nanda ang isigkatawo para lang makauna sanda sa kung ano man ria ang gusto nanda nga sanda ang nagapanguna. Ambay gani ah, hindi ko gid dya maintindihan. Ibutang ta run lang nga sa sobra kuarenta anyos ko nga edad (hi hi hi te nabuking gid ako) duro run na-agyan ko kag nalambot ko nga wara run takun ti oras magpa-indis-indis nga ria. Pero bisan halin pa kang una rugto sa SJA amo ria ang tudlo kang mga madre kanamun nga hindi kami mag-amo karia. Hay bukut ti nami dya nga ugali. Mas dapat pa laban ang pagpakita kang pagpalangga sa isigkatawo, kag pag-pangabuhi nga nagahirupay kag may kahadluk sa Gino-o. Amo lang dya ang puede makatugro kanatun kang kasadya sa adlaw-adlaw, pasalamat sa Gino-o sa mga grasya kag bugay nga ginatugro na adlaw-adlaw.

Pasensya gid

Pasensya gid sa tanan nga buhay run wara gid ako ka sulat rugya. Saku gid abi kag kadya rugya run ako sa Scotland. Kung sa diin run takun kadangat. Antes rugya nag-agto man ako sa Netherlands mga sangka semana man kami rugto. Nagkit-anay run lang kami ni Key sa Schiphol airport sa Amsterdam hay sa Edinburgh pa tana naghalin, ako tana halin gid eh sa Bangkok. Nag-agi man ako sa Frankfurt, kang naglupad pa Amsterdam. Te buhay ang hulat ko kay Key hay hapon pa ang ana nga abot, ako tana aga pa. Nag-tambay lang ako rugto sa airport. Ginbilin ko lang ang mga bagahe ko rugto sa basement nga may automatic locker, hulugan mo lang kang 6 euro bala to mong te puede rugto matago mga gamit daw pira man ka oras ukon adlaw. Te dara ko lang ang akun notebook computer kag mag lagaw lagaw. Nagpangita man ako kang lamesa nga mapungkuan tapos nag-obra man ako gamay ilabi na gid ang amun presentation sa Netherlands sa meeting rugto ah. Wara ko pa gintawgan ang amon friends hay ang appointment namun kananda 530 pm pa man. Para hindi run sanda ma-istorbo nga mag-abat 2 ka beses eh. Te sadya man akun obserbar kang mga tawo. Duro man ang mga manol manol hi hi hi. Pati ako kis-a may pagkamanol man. Esp ang sangka elevator nanda nga naga-igot te daw mag-gwa ako ka-panic kaharadlukan eh. Anyway duro man tawo sa sulud pero ano bay matabo kung mag-stock-up ria? Parehas to kang elevator sa BFAR sa QC nga tama kadaan run gid. Grabe to pirme kulba ko kada gamit ko kato mong.

OK te naka-abot run gid si Key kag ginpangita namun ang amun migo to nga mal-an nga nag-abat kanamun. Nakakita-ay man gid kami kag mayad man hay wara man tana nabuhayan ka hulat kanamun. Lawig man ang byahe halin sa airport paagto sa anda nga lugar sa Amerongen, parte man kang Utrecht. Te duro amun istoryahanay eh. Rugto kami nag-istar sa anda nga balay hasta kami magpanaw sa UK. Alaga man nanda kami kamayad. Tungud mal-am run sanda ginabuligan man namun sanda sa obra sa balay, parehas abi maghugas pinggan kag iban pa nga pag-assist.

Rugya run ako

Sa Canada ... lain gid rugya ilabi na gid ang oras. Nasadyahan man ako nga nagkita-anay kami ni Lumen nga libayun ko. Kag nagbisita man kami kay Tita Baby nga libayun ni Mommy. Nagkita-ay man kami kang darwa na ka bata. Ang isara (Nene) may bana run kag may darwa man ka bata. Si Tita Baby kag ang sangka bata na (Amy) naga-istar sa basement kang balay ni Nene. Si Lumen rugyan man kang una nag-istar kang bag-o pa lang tana sa Toronto. Nami man hay daw cozy ang ambience. Nagyapon kami rugto kag nag-istoryahanay. Sadya man ang amon pag-istoryahanay. Nami daad kung makabisita man sanday Dad & Mom pero sa kabuhayun kang byahe daw budlay gid ria kananda. Pagkatapos nagpanaw kami rugto nagpanumbalay kanday Bimbim pero wara pa tana kaabot. Si Nanay na lang kag ang mga bata na (3). Te wara run kami nagbuhay gid hay gabii run. Sangka bus ride lang man paagto kananda halin sa apartment ni Lumen pero paranawun man pasulud rugto sa housing subdivision.

Balik sa oras nga dya, mga 11 hrs ang urihi sa Pinas, te sadya hay nagtext ako through chikka sa balay ay, gabii run gali rugto, nagsabat si Mom nga mga 10 pm run kag turog run sanda ha ha ha reality check kanakun.