Ang Manami sa Lagaw

Rugya ako sa Stirling, Scotland, UK, halin kang Setyembre 2012. Ika-lima ko run dya nga agto rugya. Ang una kag ikarwa katong 2003 kag 2005-2006 kang gin-imawan ko ang akun bana sa ana nga PhD programme sa University of Stirling. Kang 2009 nagbalik ako hay akun run turno magtuon kang PhD sa aquaculture, pero mga darwa lang ako ka bulan nagtener para lang sa pagrehistro kag pagpreparar bilang estudyante.

More ...

nadura .. ano dapat

kadya ko liwat na-buksan ang blog nga dya. buhay nga nadura tungod nga mas aktibo kita rugto sa facebook, kung sa diin mas interactive abi mong. te ang pamangkot amo nga kung banhawon ko dya nga blog ukon lipatan run lang. pero daw nami man magsulat pa gid rugya. daw mas nami ang dokumentasyon kung rugya sa blog sangsa rugto sa facebook status shout out lang. ano sa inyo opinyon? naga-agree kamo? lantawon ko kung may mag-sabat.

gin-agda man ako ni Genevieve Asenjo rugto sa ana nga Balay Sugidanon blog nga magsulat man ako rugto. mayad man ra para magduro ang mga sinulatan sa kinaray-a.

te amo lang dya anay matugda ko hay mabalik pa ako sa akun gina-obra nga research ko.

Pinoy Expats/OFW Blog Awards, Inc. (PEBA): A Prayer for OFWs

Pinoy Expats/OFW Blog Awards, Inc. (PEBA): A Prayer for OFWs

Kinaray-a sa Amerika

May nabasahan ako parte sa Kinaray-a sa sanka paragwaun sa Amerika. Palihog lang click dya: Kinaray-a in an American Play. Daw karadlawan kag sadya guro dya gi? Nami daad magturuk garing hay sa marayu tana dya nga lugar. Paano bala kita ka-turuk kadya or kabasa kang bilog nga istorya?

Puede man i-click ang litrato sa dalum.

setyembre run

te tapos run ang agosto. 1 sept run kadya. nag-umpisa run ako obra sa bag-o nga project ko. pero the past few days grabe hectic ang amun pag-empake kag saylo to sa condo kag sa bag-o nga ofis. sa condo gina-pa-obra namun ang salug sa rooms islan kang tiles, tapos pintura ang walls sa bedrooms hay na-fungus. then sa bathroom pahukas ang bathtub para shower lang. te wara pa natapos e. wait pa kami hopefuly tomorrow para sa thursday rugto na kami turog. in the meantime nagmove out na kami sa staff house te stay anay kami sa balay kang student nga pinay nga nag-uli sa phils for her research.

i thank God for provision of this new job. happy man ako e hay sa old job ko daw naga-ugut lang ako rugto kag ugtas. time run gid man to move on. sayang lang efforts ko sa project nga to di man ma-compensate ka-mayad, iba lang ang magbenepisyo. te start naman ako kang akun phd. waiting pa for the exact time gid to go there basi early oct or after oct. aguy ramig2 to ria.

nagtext man ko kay mom kaina. hope ok lang to tana. i was thinking ahay wara gid to ti imaw tana ba nga sara kanatun. always praying for her and for all of you.

nagdamgo gle ko the other early morning. rugto kita sa balay, then manogpanaw run kami. nagba-bye kami kay daddy nga rugto tana sa likod as usual. naghug ako kag tana man kag kuun na mapanaw man tana sa pihak kuno nga balay. te babay e. then nagsaka man kami sa kuarto si mom rugto ga-batang. ginmangkot ko e nga "ay si dad gle rugto tana sa sanka balay ga turog?" sabat ni mom, "huud rugto tana kag may coffee lang tana". te amo dya damgo ko, feel ko ang sadness of saying goodbye!

Kinaray-a group sa Facebook

Kung sin-o interesado mag-intra sa Kinaray-a nga grupo sa Facebook, palihog lang agto sa http://www.facebook.com/home.php?#/group.php?gid=113566523225. Amo dya ang ana nga description rugto:

Extension to Antiqueños web-based community Kinaray-a.com (www.kinaray-a.com). We noticed many members are into this "in" thing in Facebook so we decided to follow you guys and create a new "house" for all Antiqueños around the world. After all you are free to go "home" anytime.

So, let's see and try something new. Same people, new environment!

Keep in touch.

Kruuhhaay sa tanan!!!

Strictly for all Antiqueños, all Karay-a by blood and by heart!

Te, dali run, agtuni nyo run to kag lantawa...

Bag-o

Buhay run nga wara ko nadugangan ang pagpost rugya. Nawili ako rugto sa main blog ko abi. May bag-o ako nga gindugang rugya - ang listahan kang mga blogs nga ginsulat sa kinaray-a ukon ginsulat kang mga taga-Antique ukon may roots halin sa Antique. Palihog lang tugrui ako kang links kang mga blogs nga ginsulat kang atun mga kasimanwa ukon ginsulat sa kinaray-a. Salamat gid.

Duro man daad ang mga manunulat halin sa atun. Nami dya kung magtiriripon bisan rugya lang sa internet. Hay duro man ang nag-aragto sa iban nga lugar, rugya sa blogosphere ukon sa mga social networking sites, makakirit-anay kita kag maka-imaw-imaw. Duro ang ginakahidlawan natun kag ang isara kadya amo ang fresh lumpia ubod nga himo ni Nang Tonya nga taga Hamtic.

bati-an ko lang

nga kuno hay internal nga isyu hindi kinahanglan magpahilabut ang iban nga wara ti labut. internal bala rian kung ang epekto kang isyu nga ria duro na-apektuhan? mismo ang wara ti labut amo gid ang na-apektuhan. te paano mo mahambal nga internal lang ra?

ma-an lang gid a.

pamati kang kanta

ano gina-obra ko kadya? bag-o lang ko tapos kaun kang igma. atubang liwat sa computer hay may ginatapos ako nga mga obra. multi-tasking mode. ako lang dya isara sa opisina. mga pulo kami katawo rugya amo ra kis-a kagahud. amo man ra ang sangka rason nga nagbakal ako kang mp3 player para matabunan ko ang gahud. te sa kadya, nagapamati ako kang OKM kag ang limug ni dante beriong ang ginapamatian ko. pakot nyo gid kung ano nga kanta dya ginapamatian ko. mauli gid kuno tana sa antique. te amo man ra ang gina-pinsar kag ginabatyag ko. kada pamati ko sa kanta nga dya naga-dugang man ang hidlaw ko sa balay kag sa akun mga ginikanan kag mga kabugtuan, syempre imaw man ang akun mga prendz. wara pa dya man-an kung san-o ako kauli liwat gani samtang nagahulat, asta lang ako sa pagpamati kang OKM. makabulong man dya gawa kang kahidlaw...

amot kang japon

nag-amot ang mga japon para sa pagpatindug kang mga balay sa mga na-apektuhan kang bagyo nga frank. nabasahan ko dya sa blog ni ellen tordesillas. pero daw may istorya nga ginbawi kuno pagkatapos ginpanagtag? ukon pagkatapos kodakay? ay ano ra man? karuluuy lang gle to ang mga nag-handum nga may balay run daad e kung tuud gid man dya nga ginbawi. kabay lang nga wara ti lain nga matabo kag ang kuarta maagto gid sa natungdan nga dapat himoon. hay kung hindi dya magtupa sa mga natungdan madudla run lang ang iban nga gusto pa daad magbulig. amo ra nga mas mayad gid nga hindi pagtugro sa gobyerno opisyal ukon probinsyal ang kuarta ukon amot kungdi sa mga local nga organisasyon nga wara ti duro ek-ek, nga ang anda motibo lang gid amo ang makabulig sa anda isigkatawo kag mapamayad ang tanan.

Concert kag Fashion Show

"ANTIQUENO BULIG ANTIQUE" OKM Live Concert kag Patadyong Fashion Show

October 17, 2008
6:00 pm
Cuneta Astrodome

Tickets nga nagabili kang P50, P100, P200, P500, and P1000 puede mabakal sa venue sa adlaw kang concert ukon mag text kay Rex Excartin at (0927) 4520778.

Ang matipon nga kuarta para sa mga nabiktima kang bagyo nga Frank.

Kabay nga mga kasimanwa sa Metro Manila maka-lantaw kag magsuporta sa amo dya nga paragwaun.

(Impormasyon halin sa iririmaw tatun yahoogroup).

OKM concert sa Cuneta Astrodome, 17 Oct 08

Nabasahan ko kaina ang anawnsment sa multiply ni anne naig parte sa OKM concert sa Cuneta Astrodome sa 17 October 2008. Concert for a cause (para sa mga na-apektuhan kang bagyo nga Frank) dya nga may Patadyong fashion show. Na-mention man dya ni Ellen Tordesillas sa last paragraph kang ana nga blog entry sa kadya nga adlaw. Ang Antique provincial government amo ang nagapasimuno sa kadya nga event. Garing hay hindi bala takun ka tambong kadya unless nga may trip ako sa Manila sa amo dya nga adlaw. Basi pa lang ...

Dungug Kinaray-a meeting

Nabuhayan man ako ba ka post rugya sa kinaray-a blog ko. Ano hay nasakuan run gid ako sa akun obra, kag rugto man ako nagconcentrate sa iban ko nga blogs. Palihog lang bisita rugto kung wara pa kamo ka dalikyat. Agto lang sa OF SOARING & DREAMING blog kag sa CARNATION blog. Duro rugto mabasahan ninyo.

Kaina gle kang aga nag-yahoo conference ang Dungug Kinaray-a officers. Garing kami lang nga apat ang naka-attend, namely Emmy, Richie, Nang Cons kag yours truly. Wara ka attend si Acay Flores kag Linda (zeanra) hay hindi sanda available. Daw may clase si Acay Flores sa amo to nga oras. Gintextan ko si Anne pero wara man ka reply. Wara man kaattend si Shao kag si Manny. Pero eniwei, nagpadayon man kami ka istorya parte sa mga entries sa current nga contest, ang event sa Dec, ang terms kang partisipasyon/involvement kang kinaray-a.com kag paranubliun antique, kag duro man nga mga labay-labay ang amun gin-istoryahan.

Wara nalambutan istorya ang parte sa budget. Gani basi sa sunod nga semana, Sabado siguro, magset liwat ang Dungug presidente nga si Emmy kang meeting. Kabay nga duro ang mag-aratend kadya para mapaynalays run ang mga hirikuton para sa Dec.

Diin run ang bugas?

Amo ra ang pamangkot kang tanan. May nagtugro kang sinako ka bugas, gintugro sa nagapamuno sa probinsya, para sa mga naapektuhan kang baha kag bagyo. Ugaring hindi kuno nanda makita kung diin run to. Nabasahan ko sa email ang amo kadya nga balita, kag nakabaton man ako kang text message halin sa balay nga amo dya ang topiko sa DYKA. Ahay a, kanugon to kung wara nag-agto sa dapat agtunan. May sara man nagkuun nga i-verify kuno anay kung may rugyan gid man nga bugas nga gintugro. Te darwa ka bagay ra, kung natugro gid man tapos nadura (basi naanod (: ) ukon wara pa gid nagtupa sa probinsya ta. Mahulat na lang kita kang masunod nga balita. Kabay nga wara ti magutom sa paghulat.

Sangka sinulatan ni John Iremil

Ang nagsulat kang artikulo nga dya, si John Iremil Teodoro, sara sa mga nakabaton kang Bugal Kang Antique award kadya nga tuig 2008.

Ang Pagsulat sa Kinaray-a
Antiqueños Community Website - Province of Antique, Philippines - Tuesday, 06 May 2008

© Antiqueños Community Website - Province of Antique, Philippines

Binalaybay ni Consoling

Sa mga interesado, palihog lang bisita sa blog ni Consoling sa dya nga link: http://binalaybay.blogspot.com/

Kuun na sa ana nga blog nga inspirado tana nga magsulat sa mga binalaybay. Kabay nga ang maga basa kang mga binalaybay nga dya ma-inspirado man kag maka-bulig paminsar kung ano gid ang pangabuhi natun dya sa kalibutan!

Nakauli Gid Man - II

Aga pa kami kag nag-abot sa Iloilo. PAL ang sakyan namun, kag brubhay ang Air Phils nag abot man. Daw ikatlo run ako ka beses nga nag-gamit sa bag-o nga airport sa Iloilo. Impressive man hay daw wara run gawa ti naga girinutuk. Ang masadya lang hay sa darwa ka puerta nga ginbuksan para mag-gwa ang mga pasahero halin sa baggage claim, may specific gle nga gawang para sa kada airline. Abu daw amo pa lang takun kadya ka kita man? So rugto sa PAL nga gawang ga pila mga tawo hay na stuck-up tungud nga ang baggage slips sa bags ginapasanto pa sa claim stubs. Te grabe ang pila so nagsaylo kami nga iban rugto sa pihak nga gawang nga abre man pero wara pa ti may naga-usar. Abaw pag-abot namun rugto naghamabal ang guardia nga hindi kami puede rugto hay para lang sa Air Phils nga pasahero. Ano to kuno? Te nagbalik liwat kami to sa pihak nga pila. Maan lang. As usual ang Iloilo airport wara ti toilet paper. Bisan daad nagbutang sanda kang tissue paper nga baydan lang. Ahay a.

Pag-gwa namun rugto may nagahurulat ang mga tawo nga may dara nga plakards para sa mga sarakyan. Syempre pili namun ang van kang Suzy Stars. 50 pesos lang pa city. Pero kung taxi 350 pesos gid kuno. Mayad hay buta run ang van kami run lang ang ginahulat te nagsakay kami. Garing hay tama pa ka aga kag kinahanglan namun mag agi sa POEA kag OWWA sa city, rugto kami anay nagderecho sa SM City Traveller's Lounge. Kanami lang hay may amo kadya rugto. Ginbilin namun ang amun mga bagahe rugto for a fee lang. May bathroom man sanda nga puede magparigos or magpanibiin ang mga travellers. Mayad man at least wara kami nagbiringkit kang amun mga dara.

Nagtaxi kami paagto sa OWWA office. Kuun ko sa driver sa unahan lang kang Sarabia. Ha ha ha te mayad wara man gid nag change ka tama ang Iloilo kungdi tultulan ko pa. Sa Medicus Bldg. ang amon tuyo agtunan. Te aga pa kami wara pa ba abre ang opisina. Duro run man gawa ang gahurulat. Sa wakas nakasulud gid man kag nagbayad ako kang akun fees sa OWWA kag Philhealth. Garing hay kinahanglan ko mag-agto sa city mismo sa Delgado para sa POEA office sa Certificate of OE kag sa Philhealth office sa rapit sa Majestic para sa ID ko nga mag sanka tuig run wara ko pa nabuul. Kung andut abi tana nga wara run lang sa sangka lugar sanda nga tanan para di run duro libot-libot. Ginbilin ko lang si Key rugto sa OWWA kag nagpanaug ako para magbantay kang jeep paagto sa Delgado. Dali lang man ako rugto hay aga pa. Then nagbantay liwat ako jeep paagto sa central market kag sta teresita church para sa philhealth. Ginpanaw ko lang gamay hay wara man gaagi jeep derecho. Abu rugto ako medyo nabuhayan. Nagreklamo pa ang staff or head nanda nga dapat wara run ang rugto sa medicus dapat dyan run lang sa Philhealth main office ako mabayad para derecho run sa system nanda for updating. Ahay a. te sala ko bala ria? Wara gid e nanda na update ang info ko esp sa dependents ko. Blanko. Anhun ko ra bay? Amo gani ra nagbuul ako para ang parents ko ka avail just in case. Te pangamuyo ko lang nga hindi nanda magamit kag kabay nga in good health sanda pirme.

Natapos gid man nabuul ko ID ko. Pagbalik ko to sa OWWA te rugto pa man si Key ha ha ha. Kuun na gani nga kadali lang kuno ako. Agto kami sunod sa SM City ahay te standby kami hay wara pa nag-abre. Nag-imaw man kami to sa mga crowd magtindug kag maghulat. Magbantay sa mga empleyado nga nagadarali magsulud basi late sanda run sa anda nga time. Pagsulud namun dayun kami agto sa foodcenter para magkaun. Grabe man kamahal kang pagkaun ba. Nagbatchoy gid ako kag puto pero daw hindi namit. Gadali na kami mag-uli sa San Jose. Pagkatapos namun buul kang bagahe sa Traveller's Lounge, ang guard ginbuligan na kami tawag ka taxi. Syempre expect man kang tip. Sa wakas naka abot kami sa terminal kang Suzy Stars kag may van nga ready to go run.

No choice kami te daw pugul-pugul ang van maan lang. Agwanta liwat kami ang amun mga tuhod kag likod magsarakit liwat dya.

Nakauli gid man-I

Hayyy naka-uli gid man ako sa Antique ... kang 30 March nag-byahe kami halin sa Bangkok pa Manila kag rugto kami hasta 3 April. May mga meetings ako para sa akun project sa urban environmental management. Nag-agto kami kang mga kaimaw ko sa project sa Local Government Academy, UP Baguio College of Arts and Communications, Solid Waste Association of the Philippines, kag sa Senate Office kung sa diin may meeting man kami kay Senator Loren Legarda. Nami man ang resulta kang amon mga meetings kag pagbalik ko sa opisina sa mid-April patay obra ako kang report hay wara ko naobra gid sa akun pagbakasyon. Rugto kami nag-stay sa Astoria Plaza Suites sa Ortigas. Ikarwa ko run nga pag-stay rugto hay nanamian man ako kag within man sa akun travel budget.

Sa apat ka adlaw rugto sa Manila, naka-agto kag naka-lagaw kami sa Robinson Galleria, Market! Market!, Serendra kag The Podium. Ang agto namun rugto para lang magkaun, kag sa gabii lang hay sa adlawon kag hapon tama man kainit. Pagsaka namun sa Baguio amo to naga-uran-uran kag tama karamig rugto. Ang Chowking gle nagfigure gid sa amun itinerary hay rugto man kami nag-pamahaw, igma, kag yapon sa amun mga byahe, hay bisan diin lang man makita mo ang CK, ilabi na sa pagbyahe pa-Baguio.

Nagkitaay kami kang magurang ko kag mga bata na rugto sa Baguio, tama lang gani ka dali hay tutal makitaay man kami sa Antique sa sunod nga semana. Kag ang libayun ko man kag mga bata na sa Manila, manug-graduate sa HS kag manug-17th birthday man kang hinablos ko sa April te dara run blow-out sa sangka Italian resto sa The Podium.

Kang 3 April nag-lupad kami ni Kiko pa Iloilo kag nagtumbo-tumbo liwat sa van paagto sa Antique. Pagapadayunon ko lang dya.

Binirayan Foundation, Inc.

Amo dya ang bag-o nga site kang Binirayan Foundation, Inc. (BFI), sangka cultural NGO nga amo ang naga-preparar kag naga-obra gid para mahiwat ang Binirayan Festival kada tuig sa probinsya kang Antique, kag ang iban pa nga mga hirikuton parte sa atun kultura kag arte sa probinsya. Ang mga myembro kang BFI amo ang mga local government units kag iban pa nga mga grupo, asosasyon, eskuelahan, pati ang sa pribado nga sektor sa probinsya nga ang anda nga interes parte sa pagtib-ong kang kultura kag arte sa Antique.

Nami dya nga hirikuton nga 'unique' kag bilang modelo kung sa diin ang gobyerno naga-obra kaimaw kang mga sibik, pribado kag iban pa nga mga grupo agud mapadayon ang atun kinaugali nga kultura, historya, kag iban pa nga mga hirikuton parte kadya.

Designed by: goFridy Solutions
Powered by: Kinaray-a.com, Inc.

Te makauli gid

Pira run lang ka adlaw makauli man gid man kami sa Antique. Salamat sa Diyos nga gintugutan na man nga mag-amo kadya ang sked namun. Yehey, bisan darwa lang ka semana, bastante run dya. Excited na ako gani.